समानुपातिक सूची बुझाउने आज अन्तिम दिन, भोलिदेखि छानबिन शुरु

काठमाडौँ । आगामी फागुन २१ गतेका लागि तय भएको प्रतिनिधि सभा सदस्य निर्वाचनको प्रक्रिया निकै उत्साहका साथ अघि बढिरहेको छ । यसैक्रममा निर्वाचन आयोगले तोकेको कार्यतालिकाअनुसार समानुपातिक निर्वाचन प्रणालीतर्फको ११० जना उम्मेदवारको बन्दसूची बुझाउने आज सोमबार, पुस १४ गते अन्तिम दिन हो ।

आयोगले हिजो पुस १३ र आज १४ गतेका लागि यो समय सीमा निर्धारण गरेको थियो। आइतबार नेपाल मजदुर किसान पार्टी ९नेमकिपा० सहित तीन साना दलले मात्र आफ्नो सूची बुझाएका थिए भने नेपाली कांग्रेस, नेकपा एमाले र नेकपा माओवादी केन्द्र लगायतका प्रमुख दलहरू आज साँझसम्म सूची बुझाउने गरी आन्तरिक गृहकार्य र छलफलमा व्यस्त छन् ।

दलहरूले बुझाउने यो सूचीमा महिला, दलित, आदिवासी जनजाति, खस आर्य, मधेसी, थारू र मुस्लिम लगायतका क्लस्टरहरूको अनिवार्य प्रतिनिधित्व गराउनुपर्ने कानुनी व्यवस्था छ । आज कार्यालय समयभित्र दर्ता भएका यी बन्दसूचीमाथि आयोगले पुस १५ गतेदेखि २० गतेसम्म विस्तृत छानबिन गर्नेछ। यदि कुनै दलको सूचीमा कानुनी प्रक्रिया वा क्लस्टर नमिलेको पाइएमा पुस २१ देखि २७ गतेसम्म सच्याउने मौका दिइनेछ। आयोगले माघ ४ गते बन्दसूचीको प्रारम्भिक प्रकाशन गर्नेछ भने माघ २० गते उम्मेदवारहरूको अन्तिम नामावली सार्वजनिक गर्ने कार्यतालिका रहेको छ।

प्रतिनिधि सभाका २७५ सदस्यमध्ये ११० जना यही समानुपातिक सूचीका आधारमा देशभरबाट प्राप्त कुल सदर मतको अनुपातमा निर्वाचित हुनेछन्।