विश्वकप फुटबल : सेनेगलमाथि फ्रान्सको शानदार जित, एम्बाप्पे चम्किए

काठमाडौँ । फिफा विश्वकप फुटबल प्रतियोगिताअन्तर्गत समूह ‘आई’ को खेलमा फ्रान्सले सेनेगलमाथि रोमाञ्चक जित दर्ता गरेको छ । अमेरिकाको न्यूयोर्कस्थित न्यू जर्सी रङ्गशालामा सम्पन्न खेलमा फ्रान्सले सेनेगललाई ३,१ गोल अन्तरले पराजित गरेको हो। प्रतिस्पर्धात्मक बनेको खेलको पहिलो हाफ बराबरीमा टुङ्गिए पनि दोस्रो हाफमा भने दुवै टोलीले आक्रामक खेल प्रस्तुत गर्दा कूल चार गोल सम्भव भएको थियो । 

खेलको ६६औँ मिनेटमा फ्रान्सका स्टार खेलाडी किलियन एम्बाप्पेले पहिलो गोल गर्दै टोलीलाई सुरुवाती अग्रता दिलाएका थिए। त्यसपछि खेलको ८२औँ मिनेटमा ब्राड्ली बारकोलाले अर्को गोल थपेपछि फ्रान्सको अग्रता दोब्बर बन्यो ।

दोस्रो हाफको अतिरिक्त समयमा सेनेगलका इब्राहिम एम्बायेले एक सान्त्वना गोल गर्दै खेललाई २,१ को स्थितिमा ल्याए पनि त्यो पर्याप्त हुन सकेन। त्यसको लगत्तै अर्को मिनेटमा फ्रान्सका लागि एम्बाप्पेले व्यक्तिगत दोस्रो गोल गर्दै टोलीको ३,१ को जित सुनिश्चित गरे ।

समूह ‘आई’ अन्तर्गत आजै अर्को खेलमा नर्वे र इराक नेपाली समय अनुसार दिउँसो ३ः४५ बजे भिड्दैछन्। यस्तै समूह ‘जे’ अन्तर्गतका खेलहरूमा साँझ ६ः४५ बजे अर्जेन्टिना र अल्जेरिया तथा राति ९ः४५ बजे अष्ट्रिया र जोर्डनबीच प्रतिस्पर्धा हुनेछ ।

• बुध, ०३ असार २०८३