बागलुङका बगानमा पाके सुन्तला, किसानले पाएनन् उचित मूल्य

बागलुङ । बागलुङका ग्रामीण क्षेत्रका सुन्तला बगान यतिबेला पहेँलै भएका छन् । तर, सुन्तला पाकेर बगान राम्रो देखिए पनि किसानले उचित मूल्य नपाएको गुनासो गरेका छन्। व्यापारीहरू बगानमै आएर सुन्तला खरिद गर्ने हुँदा हरेक वर्ष न्यून मूल्यमा बिक्री गर्न बाध्य भएको उनीहरूले बताए ।

काठेखोला, बागलुङ नगरपालिका, जैमिनी र गलकोट सुन्तला उत्पादनका लागि प्रसिद्ध क्षेत्र हुन्। सहरमा प्रतिकिलो १२० रुपैयाँभन्दा बढी पर्ने सुन्तलालाई व्यापारीले गाउँबाट ४० देखि ५० रुपैयाँमै लैजाने गरेको बागलुङ नगरपालिका–८ सिगानाका किसान टोबहादुर खड्काले बताए। व्यापारीका कारण किसान र उपभोक्ता दुवै मारमा परेको उनको भनाइ छ ।

लाखौँको सुन्तला उत्पादन गर्दै आएका खड्काले उत्पादनलाई सही रूपमा बजारीकरण गर्ने वातावरण नहुँदा समस्या भएको बताए। उनले भने, उत्पादनअनुसारको मूल्य पाउने हो भने किसानको जीवनस्तर माथि उठ्थ्यो, तर व्यापारीले साउनभदौमै आएर बगान ठेक्का लिन्छन्, हामीले सस्तोमा दिनुपर्छ। अर्का किसान हरिप्रसाद कँडेलले पनि व्यापारीले अस्वाभाविक नाफा लिँदा किसान र उपभोक्ता ठगिएको बताए। किसानबाट ८० रुपैयाँमा किनेर बजारमा १०० रुपैयाँसम्ममा बेच्ने व्यवस्था भए दुवै पक्षलाई राहत हुने उनको सुझाव छ।