मन्त्री र सचिवलाई प्रधानमन्त्री कार्कीको निर्देशन : नागरिकले महसुस गर्ने गरी काम गर्नू

काठमाडौँ । प्रधानमन्त्री सुशीला कार्कीले मन्त्री र सचिवहरूलाई १४ बुँदे निर्देशन दिँदै हरेक मन्त्रालयले नागरिकले महसुस गर्ने गरी काम गर्न आग्रह गरेकी छन् । सोमबार सिंहदरबारस्थित प्रधानमन्त्री तथा मन्त्रिपरिषद् कार्यालयमा आयोजित बैठकमा उनले मन्त्रालयहरूले ठोस कार्ययोजना तयार गरी तत्काल कार्यान्वयनमा लैजानुपर्ने बताइन् ।

उनका अनुसार गत भदौ २३ र २४ गतेका जनआन्दोलनका माग र भावनालाई ध्यानमा राख्दै सुशासन प्रवर्द्धन, भ्रष्टाचार नियन्त्रण र सेवा प्रवाहमा देखिने सुधार सुनिश्चित गर्न सरकारले गम्भीर पहल गर्नुपर्नेछ । प्रधानमन्त्री कार्कीले सरकारी खर्चमा मितव्ययिता कायम गर्न र सार्वजनिक कोषको उपयोग नतिजामूलक बनाउन अर्थ मन्त्रालयले जारी गरेको निर्देशन पत्रलाई कडाइका साथ पालना गर्न पनि सम्बद्ध निकायहरूलाई निर्देशन दिइन्।