काठमाण्डौँ । फ्रान्सका कप्तान तथा स्टार स्ट्राइकर केलियन एमबाप्पेले फिफा विश्वकपको नकआउट चरणमा इतिहासकै सर्वाधिक गोल गर्ने नयाँ कीर्तिमान बनाएका छन् ।

सन् २०२६ को जारी विश्वकपमा अद्वितीय प्रदर्शन गर्दै उनले विश्व फुटबलका पुराना दिग्गजहरूलाई पछि पार्दै यो ऐतिहासिक सफलता हासिल गरेका हुन्। एमबाप्पेले विश्वकपको नकआउट चरणमा मात्र १० खेल खेल्दै ११ गोल गरिसकेका छन्। यसअघि यो कीर्तिमान ब्राजिलका लिजेन्ड खेलाडीहरू रोनाल्डो नाजारियो र लियोनिदासको नाममा संयुक्त रूपमा समान ८,८ गोल रहेको थियो।

२७ वर्षीय एमबाप्पेले विश्वकपका विभिन्न बलिया टोलीहरूविरुद्ध नकआउट चरणमा आफ्नो कडा प्रभाव छोडेका छन्। उनले अर्जेन्टिना विरुद्ध कुल ५ गोल गरेका छन्, जसमा सन् २०१८ को राउन्ड अफ १६ मा २ गोल र २०२२ को ऐतिहासिक फाइनल खेलमा गरेको सनसनीपूर्ण ह्याट्रिक ३ गोल सामेल छ। यसका साथै उनले सन् २०२२ को राउन्ड अफ १६ मा पोल्याण्ड विरुद्ध २ गोल, सन् २०२६ को जारी विश्वकपको राउन्ड अफ ३२ मा स्वीडेन विरुद्ध २ गोल, सन् २०१८ को फाइनलमा क्रोएसिया विरुद्ध १ गोल र सन् २०२६ को राउन्ड अफ १६ मा पाराग्वे विरुद्ध पेनाल्टी मार्फत १ निर्णायक गोल गरेका छन्।