किमाथांका अरुण जलविद्युत आयोजना स्वदेशी पूँजीमै बनाइने, लगानी मोडालिटी तय

काठमाडौँ । संखुवासभाको भोटखोला गाउँपालिका–२ मा पहिचान गरिएको ४५४ मेगावाट क्षमताको किमाथांका अरुण अर्धजलाशययुक्त जलविद्युत आयोजना स्वदेशी पूँजीमा निर्माण गर्ने गरी लगानी मोडालिटी तय भएको छ । निर्माण अवधिको ब्याजसहित अनुमानित लागत ९७ अर्ब ९४ करोड रुपैयाँ रहेको आयोजना सरकार र सरकारी निकाय संस्थापक रहेको विद्युत उत्पादन कम्पनीले नै निर्माण गर्नेछ। कुल लागतको ७० प्रतिशत ऋण र ३० प्रतिशत स्वःपूँजी (इक्विटी) बाट जुटाइनेछ ।

ऋण व्यवस्थापनका लागि एचआइडिसिएल, कर्मचारी सञ्चय कोष, नागरिक लगानी कोष, सामाजिक सुरक्षा कोष, बीमा कम्पनी तथा बैंकहरूको सहवित्तीयकरण प्रस्ताव गरिएको छ। इक्विटी रकम संस्थापक, गैरआवासीय नेपाली, आयोजना प्रभावित स्थानीय तथा सर्वसाधारणबाट शेयर निष्कासनमार्फत संकलन गरिनेछ ।

आयोजनाबाट वार्षिक करिब २ अर्ब ६९ करोड युनिट विद्युत उत्पादन भई करिब १६ अर्ब ९१ करोड रुपैयाँ आम्दानी हुने अनुमान गरिएको छ ।