विद्याको समर्थनमा ओलीसँग प्यानलसहित भिड्दै ईश्वर पोखरेल

काठमाडौँ । नेकपा एमालेको एघारौँ महाधिवेशन मंसिर २७ देखि २९ सम्म काठमाडौंमा हुँदै छ । महाधिवेशन आउन एक महिनाभन्दा कम समय बाँकी रहँदा तयारी तीब्र बनाइएको छ । महाधिवेशनको तयारीसँगै नेतृत्वको लागि पनि नेताहरूबीच आन्तरिक योजना बनिरहेको छ । अध्यक्षमा पुनः केपी ओलीले आफूलाई दोहोर्याउने योजनाका साथ नीति निर्णय गराएपनि ओली निर्विकल्प अध्यक्ष नहुने भएका छन् ।

ओलीलाई वरिष्ठ उपाध्यक्ष ईश्वर पोखरेलले अध्यक्षमा चुनौती दिने तयारी गरेका छन् । पूर्वराष्ट्रपति एवम् पूर्वउपाध्यक्ष विद्यादेवी भण्डारीको समर्थनमा ईश्वरले प्यानलसहित ओलीलाई टक्कर दिने तयारी गरेका हुन् । महाधिवेशनबाट अप्रत्याशित नतिजा ल्याउने आशमा भण्डारी–पोखरेल पक्ष छ । नवीकरण भइसकेको आफ्नो सदस्यता रोकिदिएपछि भण्डारी ओलीसँग असन्तुष्ट छिन् ।

मदन भण्डारीले अघि सारेको विचार र कार्यक्रमलाई ओलीले छोड्दै गएको भन्दै भण्डारी एमालेमा सदस्यता नवीकरण गरेर राजनीतिमा फर्किन खोजेकी थिइन् । तर, ओलीले गत साउनमा दोस्रो वर्ष नवीकरण भइसकेको भण्डारीको सदस्यता रोक्ने निर्णय गराए। यही कारण भण्डारी बिच्किएकी हुन् । यही कारण आगामी महाधिवेशनमा ओलीसँग ईश्वर पोखरेल अध्यक्षमा भिड्ने तयारी गरेपनि सरमा प्रतिस्पर्धा ओली र भण्डारीबीच हुने एक पदाधिकारीले बताएका छन् ।

एमालेमा अहिले सचिवालयमा १८ जना छन् । जसमध्ये उपाध्यक्ष युवराज ज्ञवाली, अष्टलक्ष्मी शाक्य र सुरेन्द्र पाण्डे तथा सचिव योगेश भट्टराई र गोकर्ण विष्ट पोखरेलको पक्षमा उभिइसकेका छन् । उपाध्यक्षहरू विष्णु पौडेल, रामबहादुर थापा, उपमहासचिव पृथ्वीसुब्बा गुरुङ, सचिव रघुवीर महासेठ र छविलाल विश्वकर्माले कता उभिने निर्णय गरिसकेका छैनन् ।