काठमाडौँ । नेकपा एमालेको एघारौँ राष्ट्रिय महाधिवेशनमा काठमाडौँ जिल्लाका १० निर्वाचन क्षेत्रबाट ४८ जना प्रतिनिधि छानिएका छन् । काठमाडौँबाट निर्वाचित ४८ मध्ये मणिकुमार फुयाँल, सानुकुमार श्रेष्ठ, विष्णुकुमारी भुसाल, डा विजय चालिसे, विश्वराम श्रेष्ठ, उद्धव खरेललगायत ३५ जना विद्या भण्डारी पक्षधरका निर्वाचित भएको सो समूहले दाबी गरेको छ । 

नेकपा एमाले काठमाडौँ जिल्ला अध्यक्ष दीपक निरौलाका अनुसार काठमाडौँ निर्वाचन क्षेत्र नम्बर १ बाट गणेश दुलाल, विष्णुकुमारी भुसाल, रामप्रसाद ओमागाई र सफल श्रेष्ठ छन् । त्यस्तै २ नम्बर मणिराम फुयाँल, सानुकुमार श्रेष्ठ, नवराज दाहाल, शोभा कार्की र शान्ता थापा रहेका छन् । निर्वाचन क्षेत्र नम्बर ३ बाट कल्पना राजचल, इसादेवी गुरुङ, श्यामकृष्ण कर्माचार्य, विश्वराज श्रेष्ठ र डा।विदुर चालिसे निर्वाचित भएका छन् ।

क्षेत्र नम्बर ४ मा उद्धव खरेल, श्रीकृष्ण श्रेष्ठ, प्रकाश कटुवाल, सुनिता गुरुङ र सरस्वती कार्की छन् । पाँच नम्बर क्षेत्रबाट ध्रुवराज पाण्डे, रत्ना गुरुङ, रामकृष्ण श्रेष्ठ,अम्बर डङ्गोल छन् । क्षेत्र नम्बर ६ बाट विश्वनाथ लामिछाने, कृष्णप्रसाद अधिकारी, देवीमाया आचार्य, बिन्दा बुढाथोकी र श्यामकृष्ण महर्जन छन् । यो क्षेत्रबाट सबै निर्विरोध प्रतिनिधि छानिएका हुन् । ७ नम्बरबाट प्रकाश श्रेष्ठ, जीवन मानन्धर, पूर्णिमा श्रेष्ठ, सपना अर्याल र प्रमेश धिमाल छन् । यो क्षेत्रबाट पूर्णिमा र सपना निर्विरोध छनोट भएका हुन् । 

त्यस्तै ८ नम्बर क्षेत्रबाट राजेश शाक्य, शङ्कर केसी, सुशीला अधिकारी, बब्लु शिवाकोटी छन् । ९ बाट केशव प्रसाद पोखरेल, उत्तम बहादुर राउत, पूर्णकुमार तण्डुकार, रञ्जु खड्का र सानुमैया खड्का छनोट भएका छन् ।

क्षेत्र नम्बर १० बाट प्रेमबहादुर शाही, महेश तामाङ, सन्तोष खड्का, लक्ष्मी लुइँटेल काफ्ले र वसन्ती श्रेष्ठ छनोट भएका छन् । यो क्षेत्रबाट पनि सबै निर्विरोध भएका छन् । दलिततर्फ भक्त दर्नाल छनोट भएका छन् ।

यसैबिच काठमाडौँ उपत्यकाका तीन जिल्ला ललितपुर, भक्तपुर र काठमाडौँका तीन अध्यक्षहरू भने प्रतिनिधि छनोट भएनन् । आफूहरूले अभिभावकीय भूमिका खेल्दै अरूलाई अवसर दिएर प्रतिनिधि छनोट गरेको उनीहरूको भनाइ छ । 

१४ हजार ७ सय हाराहारी सङ्गठित सदस्य रहेको काठमाडौँबाट ४८ जना प्रतिनिधि छनोट हुँदा ७ हजार ५७ सङ्गठित सदस्य रहेको भक्तपुरबाट १४ जना प्रतिनिधि छनोट भएका छन् । 

७ हजार सङ्गठित सदस्य रहेको ललितपुरमा पनि १४ जना नै प्रतिनिधि छनोट भएका छन् । 

काठमाडौँका अध्यक्ष दीपक निरौला, ललितपुरका पुरुषोत्तम आचार्य र भक्तपुरका बचन देउजाले ११ औँ महाधिवेशनमा प्रतिनिधि नहुने निर्णय गरेका हुन् । निरौलाले आफूहरू अभिभावकीय रूपमा रहने सोच बनाएर यो पटक प्रतिनिधि नबनेको बताए । 

उता,काठमाडौँमा ३५ जना विद्या पक्षका प्रतिनिधि चयन भएको दाबी गरिरहेका बेला एमाले किसान महासङ्घका केन्द्रीय उपाध्यक्ष भेषराज अधिकारी प्रतिनिधि बन्नबाट रोकिएका छन् ।  किसान महासङ्घमा अध्यक्षले एकलौटी प्रतिनिधि घोषणा गरेको असन्तुष्ट पक्षले आरोप लगाएको छ ।

अधिकारी पूर्वराष्ट्रपति विद्या भण्डारीका स्वकीय सचिव समेत रहेका थिए । यता बुद्धिजीवीमा भने विद्या पक्षका गजेन्द्र थपलियालाई किसान महासङ्घमा जस्तै घोषणा गर्न रोकिएको थियो ।