सुनसरी । जनसांस्कृतिक महासङ्घ नेपाल (कोशी प्रदेश) को एकता बैठक सुनसरीको इटहरीस्थित दुर्गा पार्टी प्यालेसमा सम्पन्न भएको छ । बैठकले प्रगतिवादी साहित्यकार प्रा.डा. खेमराज खनाललाई प्रदेश संयोजक र जनवादी कलाकार खुश्बु राईलाई सहसंयोजक चयन गर्दै ७५ सदस्यीय प्रदेश समिति गठन गरेको छ।

प्रदेशका १४ वटै जिल्ला तथा महासङ्घअन्तर्गतका सात आङ्गिक संगठनलाई समेटेर समिति विस्तार गरिएको महासङ्घले जनाएको छ । महासङ्घमा जनसाहित्य सङ्घ, जनकलाकार सङ्घ, जननाट्यकर्मी सङ्घ, जनपक्षीय चलचित्रकर्मी सङ्घ, इतिहास तथा समाजशास्त्र सङ्घ, भाषा तथा लोकवार्ता सङ्घ तथा ललितकला सङ्घ आबद्ध छन् ।

कार्यक्रमका प्रमुख अतिथि तथा नेकपा केन्द्रीय कार्यसम्पादन समिति सदस्य चिरन पुनले साहित्य, कला, गीत–सङ्गीत र संस्कृतिमार्फत समाज रूपान्तरणको अभियानलाई थप सशक्त बनाउनुपर्नेमा जोड दिए। उनले आधुनिक प्रविधिसँग जोडिएर सिर्जना र सांस्कृतिक गतिविधिलाई समयअनुकूल अघि बढाउनुपर्ने धारणा व्यक्त गरे।

विशिष्ट अतिथि तथा महासङ्घका केन्द्रीय संयोजक भीम कुमाखीले संगठनात्मक एकता, वैचारिक स्पष्टता र सुदृढ संगठन निर्माणमा जोड दिए। कार्यक्रममा प्रदेश इन्चार्ज घनराज सुब्बा, निवर्तमान अध्यक्ष चेतनाथ धमला लगायतले पनि जनसांस्कृतिक आन्दोलनलाई विभाजनमुक्त र एकताबद्ध बनाउँदै अघि बढाउनुपर्ने आवश्यकता औँल्याए।

नवनिर्वाचित प्रदेश संयोजक खेमराज खनालले महासङ्घलाई वैचारिक र संगठनात्मक रूपमा अझ सक्रिय, गतिशील र प्रभावकारी बनाउने प्रतिबद्धता व्यक्त गरे। बैठकले अन्त्यमा टुटफुट र विभाजनको राजनीतिविरुद्ध जनसांस्कृतिककर्मीहरू एकताबद्ध भएर अघि बढ्नुपर्ने सन्देशसहित जनपक्षीय सांस्कृतिक आन्दोलनलाई थप सशक्त बनाउने निर्णय गरेको छ।