Media Baji

राजनीति

श्रम संस्कृति पार्टीले छान्यो समानुपातिक ४ सांसद

धरान । श्रम संस्कृति पार्टीले प्रतिनिधिसभाको समानुपातिकतर्फका चार सांसदको नाम टुंगो लगाएको छ । धरानमा आज बसेको पार्टीको बैठकले समानुपातिक प्रणालीअन्तर्गत चयन गरिने सांसदहरूको नाम तय गरी निर्वाचन आयोगमा सिफारिस गरेको हो । पार्टी अध्यक्ष हर्क साम्पाङका अनुसार विभिन्न समावेशी समूहको प्रतिनिधित्व सुनिश्चित गर्दै उम्मेदवारहरूको छनोट गरिएको छ ।

आदिवासी जनजाति समूहबाट पूर्णप्रसाद लिम्बू, खस आर्यबाट अम्बिकादेवी सङ्ग्रौला, दलित समुदायबाट राधिका रम्तेल र मधेसी समुदायबाट रुवीकुमारी ठाकुरलाई समानुपातिक सांसदका लागि सिफारिस गरिएको उनले जानकारी दिए ।

पार्टीले विधान, योग्यता र क्षमताका आधारमा उम्मेदवारहरूको छनोट गरी नाम निर्वाचन आयोगमा पठाइसकिएको जनाएको छ । हालै सम्पन्न प्रतिनिधिसभा निर्वाचनमा श्रम संस्कृति पार्टीले प्रत्यक्षतर्फ ३ सिट र समानुपातिकतर्फ ४ सिट जित्दै संघीय संसदमा उल्लेख्य उपस्थिति बनाएको छ ।