राष्ट्रिय सभाको चालु अधिवेशन आज रातिदेखि अन्त्य हुँदै

काठमाडौँ । राष्ट्रिय सभाको चालु अधिवेशन आज राति १२:०० बजेदेखि लागू हुने गरी अन्त्य हुँदैछ । मन्त्रिपरिषद्को माघ २६ गतेको सिफारिसमा राष्ट्रपति रामचन्द्र पौडेलले संविधानको धारा ९३ को उपधारा ३ बमोजिम अधिवेशन अन्त्य गरेका हुन् ।

राष्ट्रियसभाका अध्यक्ष नारायणप्रसाद दाहालले आजको बैठकमा राष्ट्रपतिबाट प्राप्त सोही अधिवेशन अन्त्यसम्बन्धी पत्रको व्यहोराबारे सभालाई औपचारिक जानकारी गराउनेछन्। योसँगै राष्ट्रियसभाको यो अधिवेशनका सम्पूर्ण औपचारिक कार्यहरू आजै सम्पन्न हुने देखिएको छ।

बैठकको अर्को मुख्य कार्यसूचीमा प्रधानमन्त्री सुशीला कार्कीले मुस्लिम आयोगको आर्थिक वर्ष २०८०/८१ को वार्षिक प्रतिवेदन पेस गर्ने कार्यक्रम रहेको छ । मध्याह्न १२:१५ बजे बस्ने बैठकमा प्रधानमन्त्रीले उक्त प्रतिवेदन पेस गर्ने तयारी रहेको संसद् सचिवालयले जनाएको छ ।