आयोगले लियो पूर्वमहानिरीक्षक खापुङको बयान

काठमाडौँ । भदौ २३ र २४ गते भएका घटनाको छानबिनका लागि गठित जाँचबुझ आयोगले तत्कालीन प्रहरी महानिरीक्षक चन्द्रकुबेर खापुङको बयान लिएको छ । आयोगले बिहीबार सिंहदरबारमा खापुङसँग बयान लिएको हो । उनीमाथि २३ भदौमा अत्यधिक बल प्रयोग गरेको र २४ गते सार्वजनिक सम्पत्तिको सुरक्षा गर्न नसकेको आरोप छ।

आयोगले अर्को साता तत्कालीन प्रधानमन्त्री केपी शर्मा ओली, गृहमन्त्री रमेश लेखकसहित राजनीतिक नेतृत्वसँग पनि बयान लिने तयारी गरेको छ। तीन महिनाको कार्यअवधि पाएको आयोगको म्याद पुस ९ गते सकिँदैछ । प्रधानमन्त्री सुशीला कार्कीले आयोगको आग्रहमा एक महिना म्याद थप गरिसकेको छ । यसैबीच सरकार र जेनजीबीच गत मंसिर २४ गते भएको १० बुँदे सम्झौताविरुद्ध सर्वोच्च अदालतमा रिट निवेदन दर्ता भएको छ।