काठमाडौँ । सरकारले विदेशी विश्वविद्यालयसँग सम्बन्धन लिएर नेपालमा शैक्षिक कार्यक्रम सञ्चालन गर्न चाहने कलेजहरूका लागि नयाँ र कडा योग्यता निर्धारण गरेको छ । नयाँ व्यवस्थाअनुसार अब नेपालमा सम्बन्धन दिन चाहने विदेशी विश्वविद्यालय विश्वका उत्कृष्ट १,००० विश्वविद्यालयको सूचीभित्र परेको हुनुपर्ने अनिवार्य व्यवस्था गरिएको छ ।

मन्त्रिपरिषद्बाट हालै स्वीकृत विदेशी शैक्षिक कार्यक्रम सञ्चालन र नियमन नियमावली, २०८३ बमोजिम अन्तर्राष्ट्रिय स्तरमा स्थापित र गुणस्तरीय विश्वविद्यालयहरूसँग मात्र शैक्षिक सहकार्य गर्न पाउने कानुनी बाटो खोलिएको हो । यसअघि विदेशी सम्बन्धनका लागि गुणस्तरका मापदण्डहरू अपेक्षाकृत रूपमा लचिलो रहेकामा अब भने सरकारले यसमा थप कडाइ गरेको छ ।