मधेस प्रहरीका घुमुवा तानिए छानबिनमा, तस्करीसँग जोडिएको आरोप

वीरगञ्ज । प्रहरी प्रधान कार्यालयले मधेस प्रदेश प्रहरी मातहत कार्यरत ३१ जना घुमुवा प्रहरीलाई छानबिनका लागि तानेको छ । प्रधान कार्यालय, प्रशासन शाखाको पत्रपछि उनीहरूलाई केन्द्रमा बोलाइएको हो । स्रोतका अनुसार सीमा नाकामा हुने अवैध ओसारपसार व्यवस्थापनमा संलग्न रहेको आशंकामा ती प्रहरी कर्मचारीमाथि छानबिन थालिएको हो। पर्सा, बारा, रौतहटदेखि सप्तरीसम्मका नाकाबाट हुने लत्ताकपडा, खाद्यान्न, हार्डवेयर तथा इलेक्ट्रोनिक्सको तस्करीसँग उनीहरू जोडिएको आरोप छ ।

प्रधान कार्यालयको कदमले मधेसमा तस्करी नियन्त्रणमा कडाइ गर्ने सन्देश दिएको छ भने प्रदेश प्रहरी नेतृत्वको सुशासनसम्बन्धी दाबीमाथि पनि प्रश्न उठेको छ।