आईसीसीले स्कटल्यान्डलाई दियो मौका, बंगलादेश विश्वकपबाट बाहिर

काठमाडौँ । स्कटल्यान्ड आईसीसी टी–२० वरीयतामा १४औँ स्थानमा छ । र, अघिल्लो विश्वकपमा स्कटल्यान्डको प्रदर्शन राम्रो थियो । सन् २०२१ को विश्वकपमा स्कटल्यान्डले बंगलादेशलाई नै हराएको थियो । सोही प्रदर्शनका आधारमा स्कटल्यान्डलाई मौका दिइएको हो । स्कटल्यान्ड अब समूह ‘सी’मा रहनेछ । उक्त समूहमा वेस्टइन्डिज, इटाली, इंग्ल्यान्ड र नेपाल छन् । स्कटल्यान्डले आफ्ना सुरुआती तीन खेल कोलकातामा खेल्नेछ । अन्तिम खेल मुम्बईमा खेल्ने तालिका छ ।

बंगलादेश विश्वकपबाट बाहिर

आईसीसी ट्वान्टी–२० विश्वकपबाट बंगलादेश बाहिरिएको छ । बंगलादेशको स्थानमा आईसीसीले स्कटल्यान्डलाई समावेश गरेको छ । दुबईमा भएको बैठकका क्रममा आईसीसीका अध्यक्ष जय शाहले यो निर्णय लिएका हुन् । आईसीसीले आफ्नो सामाजिक सञ्जालमार्फत यसबारे जानकारी गराएको छ ।

बिहीबार आईसीसीले दिएको २४ घण्टाको समयसीमाका बाबजुद बंगलादेश सरकारले भारतमा खेल्न अस्वीकार गरेको थियो । त्यसपछि आईसीसीले यो कदम चालेको हो ।