काठमाडौँ । धराम उपमहानगरपालिकाका मेयर हर्क साम्पाङ सामाजिक सञ्जालमा तीखो आलोचनाका लागि चर्चित छन् । मन नपरेको र आफूलाई लागेको जुनसुकै विषय पनि उनी तत्काल प्रतिक्रिया जनाइहाल्छन् । आफू पनि श्रम गर्ने र अरुलाई पनि श्रमदान गर्न लगाएर विकास निर्माणको काम गरेका कारण लोकप्रिय रहेका उनी सामाजिक सञ्जालकै कारण आलोचित समेत छन् ।

हालै उनले थुनामा रहेका राष्ट्रिय स्वतन्त्र पार्टीका सभापति रवि लामिछानेविरुद्ध तीखो कटाक्ष गरेका छन् । हर्क लेख्छन्, ‘नौ नौ वटा मुद्दा लागेर थुनामा बसेकाले, जसले विदेशी सेवा सुविधाका लागि नेपाली नागरिकता त्याग्यो उसैले देश बनाउने र बचाउने रे भन्दा पत्याउनु हुन्छ ?’

रवि लामिछाने जेनजी आन्दोलनमा जेलबाट बाहिर निस्किएको विषयमा उनीसँग हालै आन्दोलन छानबिन समितिले बयान लिएको थियो । सो कुरालाई समेत हर्कले कटाक्ष गर्न भ्याएका छन् । ‘जेलमा रहेकाको बयान सरकारले लिन्छ कि अदालतले कुरा नबुझेको ?’ उनले लेखेका छन् ।

सहकारी ठगी, सम्पत्ति शुद्धीकरण लगायतका विषयमा रविमाथि विभिन्न अदालतमा मुद्दा विचाराधीन छन् । जेनजी आन्दोलनले मूलधारका राजनीतिक दलहरूको सरकार ढलेपछि नयाँ राजनीतिक दल खोल्ने र चुनावको तयारी गर्ने क्रम तीब्र छ । यसै सन्दर्भमा मेयर साम्पाङले पनि श्रम संस्कृति पार्टी दर्ता गरेका छन् ।

नयाँ दल तथा स्वतन्त्र व्यक्तिहरू मिल्नुपर्ने दबाबबीच साम्पाङले कहिले रविको कटाक्ष गर्छन् त कहिले बालेन्द्र शाहको । यही विषयका कारण उनको आलोचनासमेत भइरहेको छ । हर्कको स्ट्याटसमा धनकुमारी राई लेख्छिन्, ‘मरिच आफ्नै गन्ध रागले आफै खुम्चिन्छ यहि पारा हो भने तपाईको पनि बेर छैन।’ यस्तै, ईश्वर भण्डारीले लेखेका छन्, ‘मेयर साब अरुको खेदो नखनी आफ्नु हिसाबले अघि बढ्नु पर्छ। जनताले चाहेकै त्यस्तो नेता हो ।’