काठमाडौँ । ट्राफिक प्रहरीले बुधबारदेखि लामोदुरी चल्ने गाडीमा जीपीएस जडान गर्नुपर्ने नयाँ व्यवस्था लागु गरेको छ । प्रहरीले काठमाडौँ उपत्यकाभित्र गुड्ने सवारी साधनमा सीसीटिभी तथा ड्याशबोर्ड क्यामेरा जडान सुरु गरेको छ ।

यातायात व्यवसायीहरूसँगको समन्वयमा सबै खाले यात्रु वाहक सार्वजनिक यातायातका साधनमा सुरक्षाका लागि यस किसिमको प्रबन्ध गरिएको हो ।

काठमाडौँ उपत्यका ट्राफिक प्रहरी कार्यालयका प्रहरी उपरीक्षक तथा सूचना अधिकारी नरेशराज सुवेदीले यसका लागि सरोकारवाला र व्यवसायीसँग छलफल तथा समन्वय र सहमति गरिएको जानकारी दिए । 

दुर्घटनाको अनुसन्धान, सडक सुरक्षा लगायत चोरी, पकेटमार आदि जस्ता आपराधिक गतिविधिबाट सुरक्षा कायम गर्न सीसीटिभी क्यामेरा जडान गर्न लागिएको हो,उनले भने ।