भदौ २३ गते जेनजी शहीद दिवस मनाउने सरकारको निर्णय

काठमाडौँ । सरकारले प्रत्येक वर्ष भदौ २३ गतेलाई जेनजी शहीद दिवसका रूपमा मनाउने निर्णय गरेको छ । सोमबार बसेको मन्त्रिपरिषद् बैठकका बारेमा सरकारका प्रवक्ता तथा सञ्चारमन्त्री जगदीश खरेलले यस्तो जानकारी दिएका हुन् । सरकारले जेनजी आन्दोलनका क्रममा ज्यान गुमाएका व्यक्तिहरूका आमा, बुबा, श्रीमती, अविवाहित छोरी तथा अविवाहित छोरालाई फोटोसहितको परिचयपत्र प्रदान गर्ने निर्णय पनि गरेको छ । यसअघि सरकारले सो आन्दोलनमा मारिएका ४५ जनालाई शहीद घोषणा गरिसकेको छ।

यस्तै बैठकले बैकुण्ठ प्रसाद अर्याललाई सचिव पदमा बढुवा गर्ने निर्णय गरेको छ। अर्याल हाल सुदूरपश्चिम प्रदेश सरकारका कामु प्रमुख सचिवका रूपमा कार्यरत छन्। त्यसैगरी, मन्त्रिपरिषद्ले प्रेस काउन्सिल नेपालका अध्यक्षमा डा। कुमार शर्मा आचार्यलाई नियुक्त गर्ने निर्णय गरेको सरकारका प्रवक्ता खरेलले बताए।