मन्त्री हुँदा जेनजी घटना भयो, नैतिक जिम्मेवारी लिँदै उम्मेदवार बन्दिनँ : पूर्वमन्त्री पाण्डे

काठमाडौँ । नेपाली काँग्रेसका सहमहामन्त्री बद्री पाण्डेले आगामी प्रतिनिधि सभा निर्वाचनमा उम्मेदवार नबन्ने घोषणा गरेका छन् । बाजुरामा जारी उम्मेदवार सिफारिस प्रक्रियामा सहभागी रहँदै पाण्डेले पार्टीलाई बलियो बनाउन अन्य जिम्मेवारीबाट नेतृत्व गर्ने भन्दै चुनाव नलड्ने बताएका हुन् । उनले उम्मेदवार सिफारिस प्रक्रियामै पनि नबस्ने र चुनाव लड्न अरूलाई अवसर दिने स्पष्ट पारेका छन् ।

२०७९ को चुनावमा बाजुराबाट एमाले नेता कर्ण थापालाई पराजित गरेका पाण्डे जेनजी आन्दोलनपछि अपदस्त भएको केपी ओली नेतृत्वको सरकारले उनलाई पर्यटन मन्त्री बनाएको थियो । पाण्डेका अनुसार आफू मन्त्री भएकै बेला देशमा ठूलो घटना भएकाले त्यसप्रति नैतिक जिम्मेवारी लिँदै यसपटक चुनाव नलड्ने निर्णय गरिएको हो ।

उनले भने, आन्दोलनरत युवाहरूका माग समयमै सम्बोधन गर्न नसकिएको अनुभूति छ । अन्तर्क्रियामा प्रत्यक्ष भूमिका नहुन पनि मन्त्रीपरिषद् सदस्यका रूपमा नैतिक जिम्मेवारी मेरो पनि हुन्छ ।