बुटवल । नेपाल चेम्बर अफ कमर्स लुम्बिनी प्रदेशका अध्यक्ष टंकप्रसाद पोखरेलले युवा उद्यमीसँग सहकार्य र समन्वय गरेर अघि बढ्दा निजी क्षेत्र थप सुदृढ र गतिशील बन्ने बताएका छन् । उनले युवा पुस्ताको ऊर्जा, नयाँ सोच र सिर्जनशीलतालाई स्थापित व्यावसायिक संस्थाको अनुभवसँग जोड्न सके आर्थिक विकासमा थप योगदान पुग्ने बताए ।

नेपाल उद्योग परिसंघ युवा उद्यमी मञ्च ९सीएनआईवाईईएफ० लुम्बिनीको नवनियुक्त समितिलाई नेपाल चेम्बर अफ कमर्स लुम्बिनी प्रदेशले आयोजना गरेको बधाई तथा सम्मान कार्यक्रममा अध्यक्ष पोखरेलले यस्तो बताएका हुन् ।

पोखरेलले सीएनआईवाईईएफ लुम्बिनीका नवनियुक्त अध्यक्ष बिकाश पाण्डेय नेतृत्वको समितिलाई सफल कार्यकालको शुभकामना दिँदै युवा उद्यमीका मुद्दा र निजी क्षेत्रका साझा सवालमा चेम्बर सहकार्य गर्न तयार रहेको बताए । नयाँ पुस्ताका उद्यमीलाई उद्यमशीलता, लगानी र रोजगारी सिर्जनाका क्षेत्रमा अघि बढाउन स्थापित व्यावसायिक संस्थाहरूबीच सहकार्य आवश्यक रहेको उनको भनाइ थियो ।

“युवा उद्यमीसँग सहकार्य गर्दा निजी क्षेत्र थप सुदृढ हुन्छ,” अध्यक्ष पोखरेलले भने, “नयाँ पुस्तासँग नयाँ सोच र ऊर्जा छ । त्यसलाई संस्थागत अनुभवसँग जोडेर अघि बढाउन सके निजी क्षेत्रको विकासमा थप उपलब्धि हासिल गर्न सकिन्छ ।”

कार्यक्रममा नेपाल चेम्बर अफ कमर्स लुम्बिनी प्रदेशका उपाध्यक्ष जेपी कडेलले युवा उद्यमीको सक्रियता र नयाँ पुस्ताको नेतृत्वले निजी क्षेत्रलाई थप चलायमान बनाउन महत्वपूर्ण भूमिका खेल्ने बताए । उनले युवा उद्यमीका लागि व्यवसाय विस्तार तथा नयाँ अवसर सिर्जना गर्न निजी क्षेत्रका संस्थाबीच सहकार्य र समन्वय आवश्यक रहेको उल्लेख गरे ।

त्यस्तै, सीएनआईवाईईएफ लुम्बिनीका निवर्तमान अध्यक्ष राजन कसजुले नयाँ नेतृत्वले युवा उद्यमीका साझा मुद्दालाई प्राथमिकतामा राख्दै मञ्चलाई थप प्रभावकारी रूपमा अघि बढाउने विश्वास व्यक्त गरे । उनले सीएनआईवाईईएफले युवा उद्यमीलाई एकताबद्ध गर्दै उद्यमशीलता प्रवर्द्धन र निजी क्षेत्रको विकासमा निरन्तर भूमिका खेल्दै आएको बताए ।

कार्यक्रममा सीएनआईवाईईएफ लुम्बिनीका नवनियुक्त अध्यक्ष बिकाश पाण्डेयसहित समितिका पदाधिकारी तथा सदस्यहरूलाई नेपाल चेम्बर अफ कमर्स लुम्बिनी प्रदेशले बधाई तथा सम्मान गरेको थियो ।

कार्यक्रममा चेम्बर र सीएनआईवाईईएफबीच युवा उद्यमशीलताको विकास, निजी क्षेत्रका साझा मुद्दा तथा लुम्बिनी प्रदेशको आर्थिक विकासका क्षेत्रमा आगामी दिनमा सहकार्य र समन्वयलाई थप प्रभावकारी बनाउने विषयमा समेत छलफल भएको थियो ।