चन्द्रमाको फन्को लगाएर फर्किंदै आर्टेमिस–२

काठमाडौँ । चार अन्तरिक्षयात्री बोकेको आर्टेमिस–२ मिशन चन्द्रमाको परिक्रमा गरेर पृथ्वीतर्फ फर्किएको छ। नेपाली समयअनुसार मंगलबार बिहान टोलीले चन्द्रमाको फन्को लगाएको हो। यस क्रममा मानव इतिहासमै पृथ्वीबाट सबैभन्दा टाढा पुग्ने नयाँ कीर्तिमानसमेत कायम भएको छ ।

चन्द्रमाको दक्षिणी ध्रुवतर्फको ‘फार साइड अफ द मुन’ क्षेत्रमा पुगेका बेला अन्तरिक्ष यान र पृथ्वीबीचको सम्पर्क पूर्ण रूपमा विच्छेद भएको थियो । अन्धकार र अत्यधिक चिसो रहने उक्त क्षेत्रमा प्रवेश गर्दा करिब ४० मिनेटसम्म ‘ब्ल्याकआउट’ भएको हो, जुन पूर्वानुमानित अवस्था थियो ।

अभियानको प्रत्यक्ष प्रसारण विश्वभर ठूलो संख्यामा हेरिएको प्रारम्भिक अनुमान छ। नासाका विभिन्न प्लाटफर्म, युट्युब, फेसबुक, एक्स, नेटफ्लिक्स र डिज्नीमार्फत गरिएको प्रसारण झन्डै ४ लाख किलोमिटर टाढाबाट फोर–के गुणस्तरमा उपलब्ध गराइएको थियो। यद्यपि दर्शक संख्या अझै एकीकृत गरिएको छैन ।