संसद पुनर्स्थापनाका सबै रिट एकसाथ सुनुवाइ हुने

काठमाडौँ । प्रतिनिधिसभा पुनर्स्थापनाको माग गर्दै दायर सबै मुद्दा एकैसाथ सुनुवाइ हुने भएको छ । प्रतिनिधिसभा पुनर्स्थापना माग गर्दै कांग्रेसका ५७ र अन्य दलका ३ गरी ६० निवर्तमान सांसदले दायर गरेको पूरक रिट निवेदनलाई यसअघि कांग्रेसका ८ निवर्तमान सांसदले दायर गरेको रिटसँगै राखेर सुनुवाइ गर्न सर्वोच्च अदालतले बुधबार आदेश दिएको हो ।

कांग्रेसका ५७ सांसदले पूरक रिटमा सांसद श्यामकुमार घिमिरे, सुशीला थिङसहित ८ निवर्तमान सांसदको निवेदनमा सरिक हुन पाउने माग गरेका थिए । प्रधानन्यायाधीश प्रकाशमान सिंह राउत, न्यायाधीश सपना प्रधान मल्ल, हरिप्रसाद फुयाँल, डा। मनोजकुमार शर्मा र नहकुल सुवेदीको संवैधानिक इजलासले सबै रिट सँगै राखेर सुनुवाइ गर्न आदेश दिएको छ ।

सर्वोच्चको आदेशपछि यसअघि दर्ता भएका कांग्रेसका ८ सांसद, एमालेका निवर्तमान सांसद र अन्य डेढ दर्जन रिट एकसाथ सुनुवाइ हुने छन् । प्रतिनिधिसभा पुनर्स्थापनाका मागसहित दायर १७ वटा रिटमा राष्ट्रपति कार्यालय, प्रधानमन्त्री र सभामुख लगायतबाट लिखित जवाफ आइसकेको सर्वोच्चले जनाएको छ ।