नेपालमा वायु प्रदूषणले सीमा नाघ्यो !

काठमाडौँ । नेपालमा वायु प्रदूषण फेरि उच्च बनेको छ । काठमाडौँलगायत देशका विभिन्न भेगमा सुक्खा, खडेरी र डढेलो बढेसँगै वायु प्रदूषण उच्च बनेको हो । मङ्गलबार बिहान मात्र काठमाडौँमा बाहिर निस्केर सास फेर्न नमिल्ने गरी वायुको गुणस्तर अस्वस्थकर रेकर्ड भएको थियो ।

लामो समय राम्ररी वर्षा नहुँदा वायुमण्डलमा थिग्रिएर बसेका धुलोका कणसँगै नयाँ कण थपिँदा यहाँको वातावरण प्रदूषित बन्दै गएको हो । गत साता हल्का वर्षा हुँदा पानीसँगै खसेका धुलोका कण फेरि आकासिएर तल्लो वायुमण्डल धुमिल बनाएको देखिएको वातावरण विभागले जनाएको छ ।

वातावरण निरीक्षक प्रकाश केसीका अनुसार वायु प्रदूषण खतराको तहनजिक पुगेको हो । उनले भने, “अबका दिनमा डढेलोसँगै सहरी प्रदूषण बढेको खण्डमा खतराको तह पार गर्न सक्दैन भन्न सकिन्न ।” उनले भने जस्तै काठमाडौँको वातावरण केही दिनदेखि धुम्म र धुमिल छ । बदलीका कारण आकाश पूरा नखुलेकाले पनि तल्लो वायुमण्डलको प्रदूषणयुक्त वायु माथि जान नसकेको मौसमविद् सञ्जीव अधिकारी बताए ।