Media Baji

आर्थिक खबर

बागमतीमा सार्वजनिक गाडी भाडा बढ्यो : न्यूनतम भाडा २४ रुपैयाँ

काठमाण्डौँ । बागमती प्रदेश सरकारले पेट्रोल र डिजेलबाट सञ्चालन हुने सार्वजनिक सवारीसाधनको भाडादर समायोजन गरेको छ । शुक्रबार श्रम, रोजगार तथा यातायातमन्त्रीस्तरीय निर्णयमार्फत नयाँ दर निर्धारण गरिएको हो । नयाँ भाडादर शनिबार चैत २८ देखि लागू भइसकेको छ।

यसअनुसार काठमाडौं उपत्यकाभित्र सञ्चालन हुने यात्रुवाहक सवारीसाधनको न्यूनतम भाडा २४ रुपैयाँ तोकिएको छ, जुन पाँच किलोमिटरसम्म दूरीका लागि लागू हुन्छ । यसअघि सो दूरीका लागि १९ रुपैयाँ भाडा कायम थियो ।

प्रदेश राजपत्रमा प्रकाशित सूचनाअनुसार दूरीअनुसार भाडादर क्रमशः वृद्धि गरिएको छ । १० किलोमिटरसम्मको भाडा ३३ रुपैयाँ, १५ किलोमिटरसम्म ३९ रुपैयाँ र २० किलोमिटरसम्म ४४ रुपैयाँ तोकिएको छ । २० किलोमिटरभन्दा माथिको दूरीका लागि भने ५० रुपैयाँ भाडा कायम गरिएको छ । ट्याक्सी सेवातर्फ सुरुवाती शुल्क ५८ रुपैयाँ निर्धारण गरिएको छ भने प्रत्येक २०० मिटरमा १२ रुपैयाँ भाडा लाग्नेछ ।