काठमाडौँ । अमेरिकी सैन्य आक्रमणपछि भेनेजुएलामा राजनीतिक र सुरक्षा सङ्कट चरम उत्कर्षमा पुगेको छ । भेनेजुएलाकी उपराष्ट्रपति डेल्सी रोड्रिगेजले राष्ट्रपति निकोलस मादुरो र प्रथम महिला सेलिया फ्लोरेसबारे सरकारसँग हाल कुनै सूचना नभएको र उनीहरू कहाँ छन् भन्ने तथ्य अज्ञात रहेको जानकारी दिएकी छिन् । उपराष्ट्रपति रोड्रिगेजले उनीहरू जीवितै रहेको तत्काल प्रमाण सार्वजनिक गर्न समेत माग गरिन्, जसले मादुरोको अवस्थाबारे थप रहस्य र चिन्ता पैदा गरेको छ ।

आवासीय क्षेत्रमा आक्रमण र क्षतिको विवरण रक्षामन्त्री भ्लादिमिर पाड्रिनो लोपेजले शनिबार बिहान भएको अमेरिकी हवाई हमलाले सैन्य अखडा मात्र नभई सर्वसाधारण बसोबास गर्ने आवासीय क्षेत्रहरूमा समेत ठूलो क्षति पुर्‍याएको दाबी गरे। उनका अनुसार सरकारले अहिले आक्रमणमा परी ज्यान गुमाउने र घाइते हुनेहरूको विवरण सङ्कलन गरिरहेको छ । प्रत्यक्षदर्शीहरूका अनुसार सहरको मुटुमा रहेको सैन्य अखडा ‘ला कार्लोटा’ र मुख्य सैन्य अड्डा ‘फुएर्ते तिउना’ मा भीषण विस्फोटहरू भएका छन्, जसका भिडियोहरू सामाजिक सञ्जालमा भाइरल भइरहेका छन् ।

देशभर सेना परिचालन र रक्षामन्त्रीको आह्वान रक्षामन्त्री लोपेजले विदेशी सेनाको उपस्थितिको कडा विरोध गर्दै देशभर तत्काल सशस्त्र सैन्य बल तैनाथ गर्ने घोषणा गरे। स्पेनी भाषामा सम्बोधन गर्दै उनले भेनेजुएलामाथि इतिहासकै सबैभन्दा ठूलो आक्रमण भएको बताउँदै सम्पूर्ण सर्वसाधारणलाई एकजुट हुन आह्वान गरे। उनीहरूले हामीमाथि आक्रमण गरेका छन् तर हामी झुक्ने छैनौँ, लोपेजले भने। उनले राष्ट्रपति मादुरोले आक्रमणअघि दिएको सबै सशस्त्र सेना परिचालन गर्ने अन्तिम आदेशलाई पालना गरिरहेको समेत स्पष्ट पारे ।

आक्रमणको उद्देश्य र ट्रम्पको आरोप अमेरिकी राष्ट्रपति डोनाल्ड ट्रम्पले मादुरोमाथि लागुऔषध ओसारपसार र अमेरिकामा अपराध फैलाएको गम्भीर आरोप लगाउँदै हप्तौँदेखि दबाब बढाउँदै आएका थिए। आक्रमणअघि जारी गरेको विज्ञप्तिमा राष्ट्रपति मादुरोले यसलाई देशको तेल लगायतका प्राकृतिक स्रोतसाधन कब्जा गर्ने अमेरिकी रणनीतिको हिस्सा भएको बताएका थिए । राजधानी काराकासमा एकैपटक कैयौँ सैन्य र रणनीतिक क्षेत्रमा भएका विस्फोटपछि मादुरोले राष्ट्रिय आपतकाल घोषणा गरेका थिए, तर अहिले उनी आफैँ सम्पर्कविहीन हुनुले स्थिति थप भयावह बनेको छ ।