सतर्कता केन्द्रको अनुगमन तीन गुणाले बढाइयो, ११ हजार बढी कर्मचारी कारबाहीमा

काठमाण्डौँ । प्रधानमन्त्री तथा मन्त्रिपरिषद्को कार्यालय मातहत रहेको राष्ट्रिय सतर्कता केन्द्रले प्रशासनिक ढिलासुस्ती, अनुशासनहीनता तथा आचारसंहिता उल्लंघन नियन्त्रण गर्न अनुगमन र कारबाहीलाई तीव्र बनाएको छ ।

केन्द्रका अनुसार गत चैतदेखि साउनसम्म दर्ता भएका १ हजार २९८ उजुरीमध्ये १ हजार ११४ वटा अर्थात् ८५.८२ प्रतिशत उजुरी फर्छ्यौट भएका छन्। यो अघिल्लो वर्षको सोही अवधिको तुलनामा ११.७२ प्रतिशत विन्दुले बढी हो । यस अवधिमा केन्द्रले सरकारी कार्यालयको अनुगमनसमेत उल्लेख्य रूपमा बढाएको छ । गत चैतदेखि साउनसम्म ९२४ वटा कार्यालयमा अनुगमन गरिएको छ, जुन अघिल्लो वर्षको सोही अवधिमा गरिएको ३१८ वटा अनुगमनको तुलनामा झन्डै तीन गुणा बढी हो ।