काठमाण्डौँ । अमेरिका र इरानबीचको दशकौँ लामो तनावपूर्ण सम्बन्धमा महत्त्वपूर्ण कूटनीतिक मोड देखिएको छ । स्विट्जरल्यान्डको बर्गेनस्टक रिसोर्टमा कतार र पाकिस्तानको मध्यस्थतामा जारी वार्तामा अमेरिकाले इरानमाथि लगाउँदै आएको कडा आर्थिक प्रतिबन्धलाई अस्थायी रूपमा स्थगित गर्ने निर्णय गरेको छ । यस निर्णयसँगै इरानले आगामी दुई महिनाका लागि अन्तर्राष्ट्रिय बजारमा आफ्नो कच्चा तेल डलरमा बिक्री गर्न पाउने बाटो खुलेको छ ।

यस अस्थायी छुटसँगै इरानले आगामी कम्तीमा दुई महिनासम्म अमेरिकी कम्पनीहरूसहित अन्तर्राष्ट्रिय बजारमा डलरमा तेल बेच्न पाउनेछ । यसअघि प्रतिबन्धका कारण इरानले आफ्नो तेल छायाँ सञ्जालमार्फत र मुख्यतः चीनलाई मात्र बेच्न बाध्य थियो ।  हर्मुज जलमार्गमा नौसेना तैनाथ गरी नाकाबन्दी लगाउँदा इरानका कच्चा तेल भण्डारगृहहरू भरिएका थिए, तर अब उक्त जलमार्गमा तेल तथा प्राकृतिक ग्यास बोकेका पानीजहाजहरूको आवतजावत निर्वाध हुने सहमति बनेको छ ।