काठमाडौँ । मंसिर १ गतेदेखि सुरु हुने नेपाल प्रिमियर लिग एनपीएलका लागि विद्यार्थी संगठनहरूले ५० प्रतिशत सहुतिलयत मागेका छन् । त्रिभुवन विश्वविद्यालयको क्रिकेट मैदानमा हुने खेलमा त्रिवि केन्द्रीय क्याम्पसका विद्यार्थीलाई खेल हेर्न छुट दिनुपर्ने विद्यार्थीहरूको माग छ । शनिबार त्रिविका उपकुलपति, रजिस्टार तथा नेपाल क्रिकेट संघ क्यानका अध्यक्ष र सचिवसहितको बैठकमा विद्यार्थी संगठनहरूले यस्तो माग गरेका हुन् ।

विद्यार्थी संगठनहरुले विद्यार्थीलाई स्टल राख्न दिनुपर्ने, एनपीएलबाट भएको आम्दानीबाट कम्तीमा १० प्रतिशत रकम विद्यार्थीको अनुसन्धान र शैक्षिक विकासको लागि खर्च गर्नुपर्ने, विश्वविद्यालय भित्र पार्किङ निषेध गरि विद्यार्थीको सुरक्षाको जिम्मेवारी लिनुपर्ने, रंगशाला नजिकै रहेको महिला छात्रावासमा तारजाली लगाउनु पर्ने लगायतका माग गरेका छन् । क्यानले बिहीबार सूचना प्रकाशित गरी टिकट खुल्ला गरेको जनाएको छ।

टिकटदर उद्घाटन र शनिबारका लागि सामान्य पाँच सय र प्रिमियम १५ सय रुपैयाँ तोकिएको छ भने सिजनका लागि १५ हजार तोकिएको छ ।
यस्तै, अन्य दिनका पाँच सय र एक हजार तथा प्लेअफर फाइनलका लागि एक हजार र दुई हजार रुपैयाँ तोकिएको छ । क्यानले पहिलो चरणमा प्रतियोगिताको पहिलो ६ दिनको खेलको लागि टिकट बिक्री खुल्ला गरेको हो ।