तिहार र छठ लक्षित ट्राफिक प्रहरीको विशेष सुरक्षा योजना, एक हजार छ सय जनशक्ति परिचालन

काठमाडौँ । तिहार तथा छठ पर्वलाई लक्षित गर्दै काठमाडौँ उपत्यका ट्राफिक प्रहरीले सवारी आवागमन व्यवस्थापन र यात्रुको सुरक्षाका लागि विशेष योजना बनाएको छ । चाडपर्वका समयमा सार्वजनिक सवारीसाधनमा यात्रुको चाप बढ्ने, लामो दूरीका सवारीसाधनको आवागमन बाक्लिने तथा धार्मिकस्थल र पूजास्थलमा मानिसको भिड बढ्ने भएकाले ट्राफिक प्रहरीले निगरानी र चेकजाँचलाई तीव्रता दिएको हो ।

चाडर्वका समयमा यात्रुले भोग्नुपर्ने समस्या सम्बोधन गर्न उपत्यकाका विभिन्न १४ स्थानमा यात्रु सहायता कक्ष स्थापना गरेको छ । दसैंतिहारलाई लक्षित गरी सञ्चालनमा ल्याइएका ती सहायता कक्ष छठ पर्वसम्म निरन्तर सञ्चालनमा रहने काठमाडौँ उपत्यका ट्राफिक प्रहरी कार्यालयका प्रहरी उपरीक्षक एवं सूचना अधिकारी नरेशराज सुवेदीले जानकारी दिनुभयो ।

सहायता कक्षमार्फत यात्रुलाई आवश्यक सहयोग उपलब्ध गराउनुका साथै यात्रा क्रममा देखिने समस्या समाधानमा सहजीकरण गरिने उहाँको भनाइ छ । ट्राफिक प्रहरीले विशेषगरी लामो तथा मध्यम दूरीका सार्वजनिक सवारीसाधनको प्राविधिक अवस्थालाई प्राथमिकतामा राखेको छ । उहाँका अनुसार काठमाडौँका बसपार्क, जगाती र नागढुंगामा सवारीसाधनको यान्त्रिक परीक्षण गर्ने व्यवस्था समेत मिलाइएको छ । लामो तथा मध्यम दूरीका सवारीसाधनलाई प्रस्थान बिन्दुबाट गन्तव्यतर्फ पठाउनुअघि अनिवार्य रूपमा प्राविधिक परीक्षण गरिने सुवेदीले बताउनुभयो ।

सवारीसाधनको परीक्षणका लागि प्रहरी प्रधान कार्यालयबाट खटिएको प्राविधिक टोली र ट्राफिक प्रहरी संयुक्त रूपमा परिचालन भएका छन् ।