विश्वकपअघि क्यानडासँग भिड्दै नेपाल, मुम्बईका सबै खेलका टिकट सोल्ड आउट

काठमाडौँ । आईसीसी टी–२० विश्वकपको तयारीलाई अन्तिम रूप दिने क्रममा नेपाली क्रिकेट टोलीले आज क्यानडासँग आफ्नो अन्तिम अभ्यास खेल खेल्दैछ। अघिल्लो खेलमा यूएईलाई सात विकेटले पराजित गरेर उच्च मनोबलमा रहेको नेपाली टोली क्यानडाविरुद्ध पनि जित निकाल्दै आत्मविश्वासका साथ विश्वकपमा प्रवेश गर्ने लक्ष्यमा छ।

चेन्नईस्थित एमए चिदम्बरम मैदानमा हुने यो खेल दिउँसो १ बजेर १५ मिनेटमा सुरु हुनेछ। विश्वकपअघि भारत र श्रीलङ्कामा खेलेका अभ्यास खेलहरूबाट राम्रो अनुभव बटुलेको नेपालले क्यानडाविरुद्धको आजको खेललाई आफ्नो अन्तिम शक्ति परीक्षणका रूपमा लिएको छ।

नेपालले फेब्रुअरी ८ मा बलियो प्रतिद्वन्द्वी इङ्ल्यान्डसँग खेल्दै विश्वकपको ऐतिहासिक यात्रा सुरु गर्नेछ। यसपटक समूह ‘सी’ मा परेको नेपालले दुई पटकको विश्व विजेता वेस्ट इन्डिज र एक पटकको विजेता इङ्ल्यान्ड जस्ता क्रिकेटका हस्तीहरूसँग प्रतिस्पर्धा गर्नुपर्नेछ। यो समूहमा स्कटल्यान्ड र इटाली पनि रहेका छन्।