स्वास्थ्यकर्मीलाई अत्यावश्यक अवस्थाबाहेक बिदा नलिन र उच्च सतर्क रहन मन्त्रालयको निर्देशन

काठमाडौँ । रसुवाको भोटेकोशी र त्रिशूली नदी क्षेत्रमा आएको विनाशकारी बाढी तथा पहिरोपछिको आपतकालीन परिस्थितिलाई सम्बोधन गर्न स्वास्थ्य तथा जनसङ्ख्या मन्त्रालयले स्वास्थ्य क्षेत्रमा कार्यरत सम्पूर्ण कर्मचारीहरूलाई अत्यावश्यक अवस्थाबाहेक बिदा नलिन र काज स्वीकृत नगर्न सख्त निर्देशन दिएको छ ।

मन्त्रालयको प्रशासन तथा व्यवस्थापन शाखाले शुक्रबार एक निर्देशनात्मक विज्ञप्ति जारी गर्दै बाढी र पहिरोका कारण ज्यान गुमाएकाहरूप्रति श्रद्धाञ्जली व्यक्त गर्दै प्रभावित क्षेत्रमा जारी खोज, उद्धार, स्वास्थ्य उपचार र राहत कार्यलाई थप प्रभावकारी बनाउन आफ्ना मातहतका कर्मचारीहरूलाई चौबीसै घण्टा तयारी अवस्थामा रहन भनेको छ ।