काठमाडौँ । संघीय मामिला तथा सामान्य प्रशासन मन्त्रालयले गाउँपालिका, नगरपालिका र वडाको संख्या तथा सिमाना हेरफेरसम्बन्धी प्रारम्भिक मस्यौदामा राय तथा सुझाव माग गरेको छ । मन्त्रालयले वैशाख ३ गते सबै जिल्ला समन्वय समिति, स्थानीय तह र सरोकारवाला निकायलाई पत्राचार गर्दै सुझाव दिन आग्रह गरेको हो ।

जिल्ला समन्वय समिति महासङ्घ, नेपाल नगरपालिका सङ्घ र गाउँपालिका राष्ट्रिय महासङ्घलाई समेत बोधार्थ दिँदै सहजीकरणको लागि अनुरोध गरिएको छ। मन्त्रालयका अनुसार स्थानीय सरकार सञ्चालन ऐन, २०७४ को दफा ३, ५, ६, ७ र ८ बमोजिम गाउँपालिका, नगरपालिका र वडाको संख्या तथा सिमाना हेरफेर, एक आपसमा गाभिने व्यवस्था र नगरपालिकाको वर्गीकरण पुनरावलोकनसम्बन्धी ‘मापदण्ड, २०८३’ को प्रारम्भिक मस्यौदा तयार गरिएको हो।

उक्त मस्यौदामा राय तथा सुझाव भए मन्त्रालयको इमेलमार्फत तीन दिनभित्र पठाउन अनुरोध गरिएको छ। साथै, सबै प्रदेशका मुख्यमन्त्री तथा मन्त्रिपरिषद् कार्यालयलाई पनि सोही अवधिभित्र सुझाव दिन परिपत्र गरिएको छ ।