काठमाडौँ । सञ्चार तथा सूचना प्रविधिमन्त्री जगदीश खरेलले हाल आम सञ्चार माध्यमहरूलाई टिक्न कठिन अवस्था सिर्जना भएको बताएका छन् । आइतबार सार्वजनिक सेवा प्रसारण र ‘एनटिभी वर्ल्ड’ च्यानलको औपचारिक उद्घाटन समारोहमा बोल्दै मन्त्री खरेलले सामाजिक सञ्जालको प्रभावले परम्परागत मिडियाको काम चुनौतीपूर्ण बनेको बताए ।

सामाजिक सञ्जालको दबाबबीच पनि विश्वसनीय समाचार र सूचनाको माध्यमका रूपमा परम्परागत सञ्चार माध्यमले आफ्नो भूमिका मजबुत बनाउन जरुरी रहेको उनको भनाइ छ । मन्त्री खरेलले आजदेखि सुरु भएको ‘एनटिभी वर्ल्ड’ले नेपाललाई अन्तर्राष्ट्रिय स्तरमा चिनाउन सहयोग पुर्‍याउने विश्वास व्यक्त गरे ।