काठमाडौँ । नेपाली कम्युनिस्ट पार्टीका नेता डा भीम रावलले अहिले भइरहेको निर्वाचन देशको भविष्यसँग प्रत्यक्ष जोडिएको महत्वपूर्ण अवसर भएको बताएका छन् । अछाम क्षेत्र नम्बर १ का उम्मेदवारसमेत रहेका रावलले साँफेबगरमा आयोजित अन्तरक्रिया कार्यक्रममा बोल्दै संविधानसभाको निर्वाचन जति ऐतिहासिक महत्वको थियो, अहिलेको निर्वाचन पनि त्यत्तिकै निर्णायक रहेको उल्लेख गरे ।

उनले भने, ‘संविधान निर्माणका लागि संविधानसभाको निर्वाचन जति महत्वपूर्ण थियो, अहिलेको निर्वाचन पनि उति नै महत्त्वपूर्ण छ ।’

रावलले राष्ट्रिय निर्णय गर्ने क्षमता कमजोर बन्दै गएकोतर्फ संकेत गर्दै ‘हामी आफ्नै निर्णय आफैंले गर्न सक्ने अवस्थामा हुनुपर्छ । देशलाई बलियो बनाउने जिम्मा हामी आफैंको हो,’ भने । उनले नेपाली संस्कृति कमजोर बनाउने प्रयास भइरहेको आरोप लगाउँदै नदी, नाला र प्राकृतिक स्रोतसाधन कब्जा हुँदै गएको तथा युवालाई विदेश पठाउने प्रवृत्तिले देशलाई दीर्घकालीन संकटतर्फ धकेलिरहेको बताए ।