काठमाडौँ । त्रिभुवन विश्वविद्यालय त्रिविको नाममा रहेको हजारौँ रोपनी जग्गा हिनामिना र अतिक्रमणको आरोपमा अख्तियार दुरुपयोग अनुसन्धान आयोगले औपचारिक छानबिन थालेको छ । आयोगका प्रवक्ता राजेन्द्रकुमार पौडेलका अनुसार शिक्षा मन्त्रालयबाट प्राप्त प्रतिवेदनको अध्ययनसँगै अनुसन्धान प्रक्रिया अघि बढाइएको हो ।

गत वर्ष सरकारका तर्फबाट पूर्वसचिव शारदाप्रसाद त्रितालको संयोजकत्वमा गठन गरिएको पाँच सदस्यीय छानबिन समितिले त्रिविको करिब २ हजार रोपनीभन्दा बढी जग्गा विभिन्न निकाय र व्यक्तिहरूले अतिक्रमण गरेको निष्कर्षसहितको प्रतिवेदन बुझाएको थियो ।

प्रतिवेदन अनुसार आयुर्वेद अनुसन्धान तथा तालिम केन्द्र, काठमाडौँ उपत्यका खानेपानी बोर्ड, कृषि बागवानी केन्द्रलगायत संस्थासँगै कीर्तिपुरस्थित लेबोरेटरी विद्यालयले पनि त्रिविको जग्गा आफ्नो नाममा दर्ता गर्न खोजेको पाइएको छ । सो विद्यालयले त्रिविको स्वीकृति विना जग्गा कब्जा गरी भोग चलन गरिरहेको विवरणमा उल्लेख छ।