सुनको मूल्यमा भारी गिरावट : एकैदिन ३८ सयले घट्यो, चाँदी पनि सस्तियो

काठमाडौँ । नेपाली बजारमा आज सुन र चाँदी दुवैको मूल्यमा ठूलो गिरावट आएको छ । नेपाल सुनचाँदी व्यवसायी महासंघका अनुसार आज सुनको मूल्य तोलामा ३ हजार ८ सय रुपैयाँले घटेको छ । यो गिरावटसँगै छापावाल सुनको भाउ प्रतितोला २ लाख ९१ हजार रुपैयाँ कायम भएको छ । अघिल्लो दिन सोमबार सुन प्रतितोला २ लाख ९४ हजार ८ सय रुपैयाँमा कारोबार भएको थियो ।

पछिल्लो तीन दिनदेखि सुनको मूल्य लगातार ओरालो लागिरहेको छ । गत आइतबार तोलामा १ हजार र सोमबार ३ सय रुपैयाँले घटेको सुनको भाउ आज मंगलबार थप ३ हजार ८ सयले घटेको हो। यसरी हेर्दा तीन दिनको छोटो अवधिमै सुनको मूल्यमा कुल ५ हजार १ सय रुपैयाँको गिरावट आइसकेको छ ।

सुनसँगै चाँदीको मूल्यमा पनि उल्लेख्य गिरावट देखिएको छ । महासंघका अनुसार आज चाँदीको भाउ तोलामा १ सय ५० रुपैयाँले घटेर ४ हजार ८ सय ८० रुपैयाँमा झरेको छ। सोमबार चाँदी प्रतितोला ५ हजार ३० रुपैयाँमा किनबेच भएको थियो । यसअघि गत माघ १८ गते चाँदीको मूल्यमा एकैदिन १५ सय ६५ रुपैयाँको गिरावट आएको थियो, जुन नेपाली बजारको इतिहासमै चाँदीको मूल्यमा आएको सबैभन्दा ठूलो गिरावट हो ।