काठमाडौँ । रसुवाको भोटेकोशीमा १० भदौमा आएको विनाशकारी बाढीबाट त्रिशूली–३ ‘ए’ जलविद्युत् आयोजनाको सुरुङभित्र फसेका सञ्जय साहले सुरुङभित्र अझै मानिसहरू हुनसक्ने बताएका छन् । शुक्रबार बाढी गएको १० दिनमा सुरुङबाट साह र मेकानिकल सुपरभाइजर कबिर महर्जनको जीवितै आज उद्धार गरिएको थियो ।

उद्धारपछि साहले आफू अपरेटरका रूपमा काम गर्दै आएको र बाढी आउनुअघि दुर्घटना हुँदैछ भनेर अन्य सहकर्मीहरूलाई समेत जानकारी गराउँदा आफू भाग्न नसकेको बताएका छन् । उनले १० दिनसम्म सुरुङभित्र बस्दा महामन्त्र जप गरेर बसेको बताए । उद्धारपछि साहसँगको संक्षिप्त कुराकानी ।

भित्र कति जना जति छन् होला ?

भित्र म सेन्टर रुममा अपरेटर काम गर्थेँ । अरु बेला चार पाँच जना हुन्थे । यतिबेला ४०–४५ जना नै हुनुपर्छ । कन्ट्रोल रुममा म भएपछि सबैको ज्यान बचाउनु थियो । त्यत्रो एक्सिडेन्ट भएपछि म एक्लै भागेर भएन । सबैलाई बचाउनुपर्‍यो । त्यसक्रममा मैले सबैलाई भने– एक्सिडेन्ट भयो ड्याममा भनेर । अनि सबैलाई भाग्न लगाएँ बाहिर । त्यसो गर्दा मेरो टाइम गयो । लास्टमा म निस्कनै पाइनँ ।

भित्र अझै कति जना जति अड्केको अनुमान छ ?

साथीहरूसँग कुरा गर्दा तीन चार जना मात्रै छेउछाउमा थिए । भित्रतिर पावर हाउस थियो, त्यो पावर हाउसमा पनि मानिसहरू छन् ? हुनसक्छ होला । सबै भाग्न नसकेको हुनुपर्छ । टनेल लामो छ, पानीको फोर्सले भित्र लगिसकेको हुनुपर्छ ।