काठमाडौँ । कुल गार्हस्थ्य उत्पादन जीडीपीमा सार्वजनिक ऋणको हिस्सा ४७.१३ प्रतिशत पुगेको छ । चालु आर्थिक वर्षको फागुन मसान्तसम्म सरकारले २८ खर्ब ७८ अर्ब रुपैयाँ सार्वजनिक ऋण लिँदा जीडीपीमा यसको अनुपात बढेको हो । सार्वजनिक ऋण व्यवस्थापन कार्यालयका अनुसार चालु आवको सुरुमा २६ खर्ब ७४ अर्ब ४ करोड रहेको सार्वजनिक ऋण फागुन मसान्तसम्म बढेर २८ खर्ब ७८ अर्ब २९ करोड पुगेको छ ।

फागुन मसान्तसम्म सार्वजनिक ऋणमा वैदेशिक ऋणको हिस्सा ५३.१६ प्रतिशत र आन्तरिक ऋणको हिस्सा ४६.८४ प्रतिशत रहेको छ । चालु आर्थिक वर्षको आठ महिनामा सरकारले कुल दुई खर्ब ४ अर्ब २४ करोड रुपैयाँ सार्वजनिक ऋण लिएको जनाएको छ । चालु आर्थिक वर्षमा कुल ५ खर्ब ९५ अर्ब सार्वजनिक ऋण परिचालन गर्ने लक्ष्य राखिएकोमा फागुन मसान्तसम्म दुई खर्ब ९५ अर्ब १९ करोड रुपैयाँ मात्र प्राप्त भएको छ ।