नेशनल लाइफले पहिलो त्रैमासमा कमायो १४ करोड ८ लाख रुपैयाँ नाफा, बीमाकोष खर्ब नजिक

काठमाडौँ । नेशनल लाइफ इन्स्योरेन्स कम्पनी लिमिटेडले चालू आर्थिक वर्षको पहिलो त्रैमासमा १४ करोड ८ लाख रुपैयाँ खुद नाफा कमाएको छ । कम्पनीले गत आवको पहिलो त्रैमासमा कमाएको १३ करोड ८३ लाख रुपैयाँको तुलनामा १.८१ प्रतिशतले खुद नाफा बढेको हो।

त्यसैगरी समीक्षा अवधिमा कम्पनीको खुद बीमाशुल्क आर्जन ४ अर्ब ८५ करोड ११ लाख रुपैयाँको तुलनामा चालू आवमा झण्डै १४ प्रतिशतले बढेर ५ अर्ब ५२ करोड ९४ लाख रुपैयाँ खुद बीमाशुल्क आर्जन गरेको छ। गत आवको असोज मसान्तसम्म कम्पनीको जीवन बीमाकोषमा ७५ अर्ब ७ करोड ४१ लाख रुपैयाँ रहेकोमा चालू आवको सोही अवधिमा २४.७२ प्रतिशतले बढेर ९३ अर्ब ६३ करोड ५२ लाख रुपैयाँ पुगेको छ ।

यता कम्पनीको कुल आम्दानी ६ अर्ब ६९ करोड ३६ लाख रुपैयाँबाट ९।२३ प्रतिशतले बढेर ७ अर्ब ३१ करोड १४ लाख रुपैयाँ पुग्दा कुल खर्च पनि ६ अर्ब ३० करोड २५ लाख रुपैयाँबाट १०.५८ प्रतिशतले बढेर ६ अर्ब ९६ करोड ९१ लाख रुपैयाँ पुगेको छ । यस कम्पनीले गत आवको तीन महीनामा आफ्ना अभिकर्ताहरूलाई ४२ करोड ६१ लाख रुपैयाँ कमिशन दिएकोमा चालू आवको तीन महीनामा झण्डै १२ प्रतिशतले बढाएर ४७ करोड ७१ लाख रुपैयाँ कमिशन दिएको छ।

कम्पनीको प्रतिशेयर आम्दानी भने ३६ पैसाले घटेर १०.३० रुपैयाँमा झरेको छ । गत आवमा कम्पनीको प्रतिशेयर आम्दानी १०.६६ रुपैयाँ रहेको थियो। कम्पनीको प्रतिशेयर नेटवर्थ भने १३१.५४ रुपैयाँ रहेको छ। चुक्ता पूँजी ५ अर्ब ४७ करोड २७ लाख रुपैयाँ रहेको यस कम्पनीको शेयर प्रिमियम २ करोड ७८ लाख रुपैयाँ, महाविपत्ति कोषमा ६८ करोड १३ लाख रुपैयाँ र जगेडा कोषमा ६३ करोड ८० लाख रुपैयाँ सञ्चिति रहेको छ ।