१६ असोज, काठमाडौँ । नेपालबाट मनसुन बाहिरिने औसत मिति आज, अक्टोबर २ अर्थात् असोज १६ गते हो । तर औसत मिति भएकाले हरेक वर्ष यही दिन मनसुन बाहिरिन्छ भन्ने हुँदैन । मौसमको अवस्था हेरेर केही दिनअघि वा पछि मनसुन बाहिरिने गर्छ । यस वर्ष भने नेपालबाट मनसुन औसत समयभन्दा केही ढिला बाहिरिने देखिएको छ । मौसम पूर्वानुमान महाशाखाका मौसमविद् सञ्जीव अधिकारीका अनुसार तत्काल मनसुन बहिर्गमनसम्बन्धी औपचारिक बुलेटिन जारी हुने सम्भावना छैन ।

उनका अनुसार अब एक–दुई दिनभित्र पश्चिम नेपालबाट मनसुन बाहिरिएको घोषणा गर्न सकिनेछ । त्यसपछि क्रमशः अन्य क्षेत्रबाट पनि मनसुन हट्दै जानेछ । नेपालबाट मनसुन एकैपटक सम्पूर्ण रूपमा बाहिरिने गर्दैन । पश्चिमी भूभागबाट सुरु हुने बहिर्गमन क्रमशः पूर्वतर्फ सर्दै कोसी प्रदेश हुँदै देशबाट पूर्ण रूपमा बाहिरिन्छ । यसका लागि केही दिन समय लाग्ने मौसमविद् अधिकारीले बताएका छन् ।