दुर्गा प्रसाईंका प्रतिनिधिसँग वार्ता गर्दै गृह मन्त्रालय

काठमाडौँ । सरकार र दुर्गा प्रसाईं समूहबीच आज वार्ता हुँदै छ । गृह मन्त्रालयमा हुने वार्तामा प्रसाईंको समूहबाट माधव प्रसाद खतिवडा, देवी प्रसाद संग्रौला, प्रेमकुमार थाम्सुहाङ, प्रेम थापामगर, तिजेन्द्र प्रसाद रायमाझी, मकबुल साह लगायत सहभागी हुँदैछन् । मंसिर ७ गतेदेखि आन्दोलन गरेका दुर्गा प्रसाईंको समूहलाई सरकारले वार्तामा बोलाएको हो । आजको वार्तामा प्रसाईं भने सहभागी नहुने भएका छन् ।

उनी प्रधानमन्त्रीस्तरीय वार्तामा बस्ने प्रसाईं समूहका एक सदस्यले बताए । प्रसाईंले ७ मंसिरबाट देशभर आन्दोलन गर्ने घोषणा गरेका छन् । आन्दोलनमा उनले नेपाली कांग्रेस बीपीसँग सहकार्य गरेका छन् । यसअघि गत १५ चैतमा पनि प्रसाईंको नेतृत्वमा तीनकुनेमा आन्दोलन भएको थियो । आन्दोलन हिंसात्मक बन्दा तोडफोड, आगजनी र लुटपाट भएको थियो ।