काठमाडौँ । मधेश प्रदेशमा नेपाली कांग्रेस संसदीय दलका नेता कृष्णप्रसाद यादव मुख्यमन्त्री नियुक्त भएका छन् । उनलाई प्रदेश प्रमुख डा। सुरेन्द्र लाभले संविधानको धारा १६८ को उपधारा २ बमोजिम मुख्यमन्त्री नियुक्त गरेका हुन् । यादव सात दलीय गठबन्धनको समर्थनमा मुख्यमन्त्री बनेका हुन् । कांग्रेस, जसपा नेपाल, जनमत, नेकपा माओवादी केन्द्र, लोसपा र एकीकृत समाजवादीका ७७ सांसदको समर्थनमा उनी नियुक्त भएका हुन्।

एमालेका सरोज कुमार यादवले गत मङ्सिर १७ गते राजीनामा दिएपछि उपधारा २ अनुसार नयाँ सरकार गठनका लागि प्रदेश प्रमुखले आह्वान गरेका थिए।
गत कार्तिक २३ गते राति एमालेका यादवलाई संविधानको धारा १६८ को ३ अनुसार मुख्यमन्त्री नियुक्त गर्दा सातदलीय गठबन्धनले सर्वोच्च अदालतमा रिट दायर गरेको थियो । सर्वोच्च अदालतले मङ्सिर १५ गते २४ घण्टाभित्र तत्कालीन सरकारलाई विश्वासको मत लिन वा लिन नसके उपधारा २ अनुसार अर्को सरकार गठन गर्न आदेश दिएको थियो ।