बाढी–पहिरो प्रभावितका लागि केआईईसीको १५ लाख ५५ हजार ५५५ रुपैयाँ सहयोग

काठमाडौँ । भोटेकोशी क्षेत्रलगायत देशका विभिन्न स्थानमा आएको बाढी तथा पहिरोबाट प्रभावित नागरिकको राहतका लागि केआईईसीले प्रधानमन्त्री दैवी प्रकोप उद्धार कोषमा १५ लाख ५५ हजार ५५५ रुपैयाँ सहयोग गरेको छ । केआईईसीको मुख्य कार्यालयसहित देशभर रहेका शाखाहरूको संयुक्त पहल तथा योगदानबाट संकलित रकम उद्धार कोषमा हस्तान्तरण गरिएको हो ।

नगद सहयोगसँगै केआईईसीले प्रभावित नागरिकका लागि रक्तदान कार्यक्रम सञ्चालन गर्नुका साथै अत्यावश्यक राहत सामग्री संकलन गरी सम्बन्धित निकायमार्फत प्रभावित क्षेत्रमा पठाउँदै आएको जनाएको छ । विपद्का कारण खाद्यान्न अभाव र स्वास्थ्य जोखिम बढ्न सक्ने अवस्थालाई ध्यानमा राख्दै प्रभावित नागरिकको तत्कालीन आवश्यकता पूरा गर्न निरन्तर सहयोग गर्ने केआईईसीले जनाएको छ ।

केआईईसीले बाढी तथा पहिरोमा ज्यान गुमाउनेप्रति श्रद्धाञ्जली व्यक्त गर्दै घाइतेको शीघ्र स्वास्थ्यलाभ तथा घरबारविहीन परिवारको सुरक्षित पुनःस्थापनाको कामना गरेको छ । साथै उद्धार तथा राहतमा खटिएका सुरक्षाकर्मी, स्वास्थ्यकर्मी, स्वयंसेवक तथा स्थानीय समुदायप्रति सम्मान व्यक्त गर्दै विपद्को सामना गर्न सबैलाई आफ्नो क्षमता अनुसार सहयोग गर्न आह्वान गरेको छ ।