बजारमा खाना पकाउने ग्यासको अभाव, निगमले थाल्यो केन्द्रीय कार्यालयबाटै बिक्री वितरण

काठमाडौँ । बजारमा खाना पकाउने ग्यास एलपीजीको अभाव भएको गुनासो बढ्दै गएपछि नेपाल आयल निगमले सर्वसाधारणका लागि टेकुस्थित केन्द्रीय कार्यालयबाटै ग्यास बिक्री वितरण सुरु गरेको छ । विभिन्न डिलरहरूमा ग्यास नपाइएको भन्दै उपभोक्ताबाट निरन्तर गुनासो आएपछि निगमले कार्यालय परिसरमै काउन्टर स्थापना गरी प्रत्यक्ष बिक्रीको व्यवस्था मिलाएको हो ।

निगमका प्रवक्ता मनोज ठाकुरका अनुसार हाल नेपाल ग्यास को वितरण सुरु भइसकेको छ भने एभरेस्ट ग्यास र सुगम ग्यास का काउन्टर पनि छिट्टै सञ्चालनमा ल्याइने तयारी छ। ‘जसलाई ग्यास अत्यावश्यक छ र आफ्ना नियमित डिलरबाट पाउनुभएको छैन, उहाँहरूले खाली सिलिन्डर लिएर टेकु कार्यालयमा आए सहज रूपमा ग्यास लिन सक्नुहुन्छ,’ उनले बताए ।

बजारमा ग्यासको कृत्रिम अभाव सिर्जना भएको हल्ला चलिरहेको सन्दर्भमा निगमले भने आयात र आपूर्तिमा कुनै समस्या नरहेको स्पष्ट पारेको छ। भन्सारको तथ्यांकअनुसार मागअनुसार नै एलपीजी आयात भइरहेको र आपूर्ति व्यवस्थापन सामान्य अवस्थामा रहेको निगमको दाबी छ ।