चितवन । कलाकार सीताराम कट्टेल धुर्मुसले भरतपुर महानगरपालिकाले आफूलाई धोका दिएको बताएका छन् । चितवनस्थित गौतम बुद्ध अन्तर्राष्ट्रिय क्रिकेट रंगशाला निर्माणबाट हात झिकेका धुर्मुसलाई महानगरले दिनुपर्ने रकम नदिएर हैरान बनाएपछि उनले अब त्यहाँ नजाने बताएका हुन् । ‘धुर्मुस’ले भावुक हुँदै भने, ‘म सहनशील मान्छे हुँ, धेरै सहेँ। भरतपुरबासीसँग मेरो कुनै दुःख–गुनासो छैन। तर भरतपुर महानगरपालिकासँग मेरो स्पष्ट सम्झौता थियो। त्यसरी नै मलाई बिदा गरिन्छ भन्ने थियोे । तर पाँच वर्षसम्म पनि उपाय आएन। भरतपुरबासीसँग फेरि भेट होला, तर महानगर कार्यालयमा आजको यो भेट नै अन्तिम हो। अब आउदिन ।’

धुर्मुस–सुन्तली फाउन्डेसनले निर्माण सुरु गरेको गौतम बुद्ध रंगशालामा करिब १८ करोड रुपैयाँ तिर्न बाँकी रहेको सरकारी प्रतिवेदनले देखाएको छ । सरकारले भरतपुर महानगरमार्फत १५ करोड रुपैयाँ भुक्तान दिने घोषणा गरिसकेको छ । तर, महानगरले धुर्मुसलाई बारम्बार धाउँदासमेत कागजपत्र नपुगेको भन्दै फर्काइदिने गरेको छ । रंगशाला निर्माणको परियोजनामा डुबेका धुर्मुस मानसिक रुपमा विक्षिप्त छन् । उनकी एकमात्र छोरी दीर्घरोगी छन् ।
यस्तो अवस्थामा उनकी पत्नी कुञ्जना घिमिरेले आफूले धुर्मुसलाई अहिलेसम्म लतार्दै बचाएर ल्याएको भन्दै अब बचाउने जिम्मा जनताको भएको बताएकी छन् ।