रास्वपा र विवेकशील साझा पार्टीबीच एकता घोषणा

काठमाडौँ । राष्ट्रिय स्वतन्त्र पार्टी रास्वपा र विवेकशील साझा पार्टीबीच एकता घोषणा भएको छ । काठमाडौंमा आइतबार आयोजित एकता घोषणा सभामा दुई दलका नेताहरूले एकीकरणसम्बन्धी सहमति पत्रमा हस्ताक्षर गरे । रास्वपाका तर्फबाट कार्यबाहक सभापति डोलप्रसाद अर्याल र डा स्वर्णिम वाग्लेले हस्ताक्षर गरेका छन् भने विवेकशील साझाकी अध्यक्ष समीक्षा बाँस्कोटा र उपाध्यक्ष प्रकाशचन्द्र परियारले हस्ताक्षर गरे ।

सहमति अनुसार वैकल्पिक राजनीतिको प्रवर्द्धनमा स्व। उज्वल थापा र ‘विवेकशील अभियान’को योगदान दस्तावेजीकरण गरी मान्यता दिइनेछ। महाधिवेशनसम्मका लागि बनाइएको ‘विशेष संयन्त्र संघीय नेतृत्व मञ्च’मा विवेकशील साझाबाट आउने नेताहरू आपसी समझदारीमा मनोनयन हुने सहमति भएको छ। मञ्चका सदस्यहरूको वरियता केन्द्रीय समितिका सदस्य सरह हुनेछ।

विवेकशील साझाका सदस्य र सल्लाहकारलाई केन्द्रीय, प्रादेशिक र स्थानीय तहगत संरचनामा जिम्मेवारी तोक्दा योग्यता, समावेशिता र सार्वजनिक छविलाई आधार मानिने सहमतिमा उल्लेख गरिएको छ । कीकरणपछि दलको नाम ‘राष्ट्रिय स्वतन्त्र पार्टी’ रहने छ । दलको झण्डामा निलो पृष्ठभूमिमा सेतो रङ्गको गोलाकार बीच निलो रङ्गको घण्टीको आकृति रहनेछ र दलको चिह्न ‘घण्टी’ रहनेछ ।