काठमाण्डौँ ।  सडक दुर्घटना न्यूनीकरणलाई प्राथमिकतामा राख्दै सञ्चालन भइरहेको ‘दुर्घटना न्यूनीकरण विशेष अभियान तथा ट्राफिक सप्ताह २०८२’ अन्तर्गत काठमाडौं उपत्यकामा दोस्रो दिन व्यापक सचेतनामूलक गतिविधि सञ्चालन गरिएको छ। अभियानबाट एकै दिन झण्डै १९ हजार ९ सय २३ जना सडक प्रयोगकर्ता प्रत्यक्ष लाभान्वित भएका छन् ।

ट्राफिक प्रहरीले यात्रु, पैदलयात्री र चालकलाई केन्द्रमा राखेर जेब्राक्रसिङ, आकाशेपुल र सब–वे प्रयोगबारे व्यवहारिक अभ्यास गराउँदै सुरक्षित सडक प्रयोगको सन्देश प्रवाह गरेको छ। यस क्रममा ५ हजार ३ सय १ जना यात्रु तथा पैदलयात्रीलाई सुरक्षित रूपमा बाटो काट्ने अभ्यास गराइएको ट्राफिक प्रहरी कार्यालयले जनाएको छ ।

सडकमा चालकको स्वास्थ्य र व्यवहार सुधारलाई जोड दिँदै ३ सय १९ जना चालकको एकदिने आँखा परीक्षण, २ सय ११ जना चालक–परिचालकसँग चियापानसहित अन्तरक्रिया, ४२ जना टिपर चालकलाई दुर्घटना न्यूनीकरण प्रशिक्षण तथा ८३ जना ट्राफिक स्वयंसेवक परिचालन गरिएको थियो ।

त्यसैगरी ४ हजार ८ सय ३५ जना चालक–परिचालकसँग दुई मिनेट सचेतना कार्यक्रम सञ्चालन गरिएको थियो भने २ हजार २ सय ३४ जना दुई पाङ्ग्रे र २ हजार ९ सय ३७ जना चार पाङ्ग्रे सवारी चालकलाई विशेष सचेतना दिइएको छ। रात्रीकालीन समयमा मात्रै २ हजार ८ सय ८ जना सडक प्रयोगकर्तालाई ट्राफिक नियम र सुरक्षाबारे जानकारी गराइएको प्रहरीले जनाएको छ।

सडक सुरक्षालाई थप प्रभावकारी बनाउने उद्देश्यले २ सय ७० स्थानमा सडक फर्निचर सरसफाइ, १ सय ३५ सवारी साधनलाई पिक एन्ड ड्रप व्यवस्थापनबारे जानकारी, १० हजार ६ सय १० जनालाई पर्चा–पम्प्लेट वितरण तथा ४ हजार ५ सय १४ वटा ट्राफिक सचेतनामूलक स्टिकर टाँस गरिएको छ।

ट्राफिक प्रहरी कार्यालयका प्रवक्ता प्रहरी उपरीक्षक नरेश राज सुवेदी का अनुसार सानो लापरबाहीले ठूलो दुर्घटना निम्त्याउन सक्ने यथार्थलाई आत्मसाथ गर्दै सुरक्षित सडक संस्कार विकास र जनधनको क्षति न्यूनीकरण गर्ने लक्ष्यसहित ट्राफिक सप्ताह सञ्चालन भइरहेको छ।