वैकल्पिक कम्युनिस्ट शक्ति बनाउन छलफलमा जुटे विप्लव, घनश्याम र जनार्दन

काठमाडौँ । वामपन्थी दलहरूको एकता र विग्रह भइरहेको अवस्थामा नेपाल कम्युनिष्ट पार्टीका महासचिव नेत्रविक्रम चन्द विप्लव नेकपा माओवादी केन्द्रका महासचिव जनार्दन शर्मा र एकीकृत समाजवादीका महासचिव घनश्याम भुसालबीच छलफल भएको छ । विप्लव, घनश्याम र जनार्दन नयाँ वैकल्पिक कम्युनिस्ट शक्ति निर्माणका लागि छलफलमा जुटेका हुन् ।

शुक्रवार बिहान हरिसिद्दीस्थित विप्लव निवासमा भएको तीन नेता बीचको भेटमा पछिल्लो विकसित परिस्थिति र आगामी सहकार्यलाई कसरी बढाउन सकिन्छ भन्ने बारेमा छलफल भइरहेको विप्लव निकट एक नेताले जानकारी दिए । कम्युनिस्ट आन्दोलन र आगामी निर्वाचनका हिसाबले समेत गम्भीर र फराकिलो ढंगले छलफल भइरहेको भेटलाई अर्थपूर्ण ढंगले हेरिएको नेताहरूको दाबी छ ।

हालै नेकपा एकीकृत समाजवादी र माओवादी लगायतका १० समूहबीच एकता भएर नेपाली कम्युनिस्ट पार्टी बनेको छ । सो एकताप्रति असहमति प्रकट गर्दै घनश्याम र जनार्दन अलग भएका हुन् । उनीहरूले पुष्पकमल दाहाल प्रचण्ड र माधवकुमार नेपालले नेतृत्व परित्याग गरी पार्टी नेतृत्व पछिल्लो पुस्तालाई हस्तान्तरण गर्नुपर्ने बताउँदै आएका छन् ।