काठमाडौँ । नेकपा एमालेकी नेतृ बिन्दा पाण्डेले पार्टीको उपाध्यक्ष पदमा उम्मेदवारी दिएकी छन् । नेतृ अष्टलक्ष्मी शाक्यको प्रस्तावमा पाण्डेले उपाध्यक्ष पदका लागि उम्मेदवारी दर्ता गराएकी हुन् । पार्टीको जारी ११औँ महाधिवेशनमा नेतृत्व चयन प्रक्रिया अघि बढिरहेका बेला उनले उम्मेदवारी दिएकी हुन् । अष्टलक्ष्मी शाक्यले महाधिवेशनसँगै पार्टीको जिम्मेवारीबाट बाहिरिने घोषणा गरेकी छन् । शाक्य बाहिरिँदै गर्दा उनले पाण्डेलाई अगाडि बढाएकी हुन् ।

पाण्डे नेकपा एमालेको स्थायी कमिटी सदस्य हुन् । विद्यार्थी आन्दोलनबाट राजनीतिमा प्रवेश गरेकी पाण्डे २०३७ सालदेखि राजनीतिक गतिविधिमा संलग्न छिन् । २०६२ सालमा एमाले महिला विभागले लैङ्गिक मुद्दासम्बन्धी आठ बुँदा पारित गर्दा त्यससम्बन्धी पुस्तकसमेत प्रकाशन गरेकी थिइन् ।