दुर्गा प्रसाईँसँग कुरा बिग्रिएपछि धवल शम्शेरले एक्लै गरे २९ गते दल दर्ता गर्ने घोषणा

काठमाडौँ । राप्रपाबाट अलग भएको डा। धवल शम्शेर राणाको समूहले निर्वाचन आयोगमा आगामी २९ गते दल दर्ताका लागि जाने घोषणा गरेको छ ।

राणाले सामाजिक सञ्जालमार्फत सार्वजनिक आह्वान गर्दै सो घोषणा गरेका हुन् । पार्टीका सर्वोच्च नेता भनिएका दुर्गा प्रसाईँ भने तत्काल दल दर्ताको विषयमा सहमत छैनन् ।

उनले तयारी नपुगेको भन्दै दल दर्ता अहिले नहुने भनेर सामाजिक सञ्जालमा स्ट्याटस लेखेका थिए । तर प्रसाईँले हिजो दिएको एक अन्तरवार्ताबाट भड्किएका राणाले एक्लै दल दर्ताका लागि आह्वान गरेका हुन् । उनले एकल हस्ताक्षर रहेको आह्वान पत्रमा भनिएको छ, ‘नयाँ प्रस्तावित दल जय नेपाल पार्टीमा आबद्ध रहनुभएका र आबद्ध हुन चाहनुहुने सम्पूर्ण नेतागण पार्टीपङ्ति तथा शुभेच्छुक मित्रहरूलाई निम्न मिति र स्थानमा उपस्थित भई दल दर्ताको शुभ कार्यमा उत्साह र उमङ्ग थप्न हार्दिक आह्वान र अनुरोध गर्दछु ।’